: భారీ స్థాయిలో పేలుడు పదార్థాలను మోసుకెళ్లి ఢీ కొట్టడం ద్వారా లక్ష్యాలను నాశనం చేసే సరికొత్త 'ఆత్మాహుతి డ్రోన్‌'ను ఇరాన్‌ అభివృద్ధి చేసింది. ప్రాథమికంగా సముద్ర సంబంధిత నిఘా కోసం ఆ దేశ సైనిక విభాగం 'రెవల్యూషనరీ గార్డ్స్‌' దీన్ని రూపొందించినట్లు ఓ వార్తాసంస్థ వెల్లడించింది. అయితే, సముద్రంతోపాటు భూమిపైగల లక్ష్యాలనూ ఆత్మాహుతి దాడులతో ఛేదించే సామర్థ్యం దీనికి ఉందని పేర్కొంది. భారీస్థాయిలో పేలుడు పదార్థాలను ఇవి మోసుకెళ్లగలవని.. క్షిపణులను మాత్రం వీటి ద్వారా ప్రయోగించలేరని వివరించింది. నీటి ఉపరితలంపై కేవలం అర మీటరు ఎత్తులో గంటకు 250 కిలోమీటర్ల వేగంతో ఇవి ప్రయాణించగలవని పేర్కొంది.
అవసరాన్ని బట్టి 900 మీటర్ల ఎత్తు వరకూ ఎగురుతాయని సూచించింది. అమెరికాకు చెందిన ఆర్‌క్యూ-170 సెంటినల్‌ డ్రోన్‌ నిర్మాణం ఆధారంగా 'సీఘెహ్‌' అనే సరికొత్త డ్రోన్‌ను తాము రూపొందించినట్లు ఇరాన్‌ ఈ నెలారంభంలో ప్రకటించింది.