కావలసిన పదార్థాలు: కమలా తొక్కలు - ఒక కప్పు, ఉల్లిపాయ, టొమాటో - ఒక్కోటి, వెల్లుల్లి రెబ్బలు - ఆరు, చింతపండు - నిమ్మకాయ సైజులో, కారం - ఒక టీస్పూన్‌, ధనియాల పొడి - మూడు టీస్పూన్లు, పసుపు - అర టీస్పూన్‌. 

తాలింపుకు: నూనె - నాలుగు టేబుల్‌ స్పూన్లు (నువ్వులనూనె), ఆవాలు - ఒక టీస్పూన్‌, మినపప్పు - రెండు టీస్పూన్లు, జీలకర్ర - ఒక టీస్పూన్‌, శెనగపప్పు - రెండు టీస్పూన్లు. 
తయారీ విదానం: కమలా తొక్క లోపల తెల్లగా ఉండే తీగల్ని ముందుగా తీసేయాలి. ఇవి ఉంటే చేదు వస్తుంది. ఉల్లి, టొమాటో ముక్కలు తరగాలి. కమలా తొక్కల్ని సన్నటి ముక్కలుగా తరగాలి. వేడిచేసిన నూనెలో ఆవాలు వేసి అవి చిటపటమనేప్పుడు శెనగ పప్పు, మినపప్పు, జీలకర్ర వేసి బంగారు రంగు వచ్చే వరకు వేగించాలి. తరువాత ఉల్లి, వెల్లుల్లి ముక్కలు వేయాలి. ఉల్లి ముక్కలు మెత్తబడగానే కమలా తొక్కల తరుగు, టొమాటొ తరుగు వేసి మూడు నిమిషాలు ఉడికించాలి. ఆ తరువాత కారం, ధనియాల పొడి వేసి మరో నిమిషం పాటు వేయించాలి. పచ్చి వాసన పోయేవరకు స్టవ్‌ మీదే ఉంచాలి. అంతే కమలా తోక్క గ్రేవీ రెడీ. గ్రేవీ ఇష్టం లేనివారు అందులో గ్లాసు నీరును పోసి స్టవ్‌ మీద ఉడికించాలి. అప్పుడు కమలా తొక్క కూర రెడీ అవుతుంది. ఈ కూరని వేడివేడి అన్నం, ఇడ్లీ లేదా దోసెలతో తింటే చాలా బాగుంటుంది.