సోమాలియా రాజధాని మొగదిషులో ఆదివారం ఉదయం ఆత్మాహుతి దాడి సంభవించింది. ఈ పేలుడు ధాటికి 16 మంది మృతి చెందగా, 48 మంది గాయపడినట్లు అక్కడి అంబులెన్స్‌ వర్గాలు వెల్లడించాయి. గాయపడిన వారిని చికిత్స నిమిత్తం దగ్గర్లోని ఆసుపత్రికి తరలించినట్లు ఏఎంఐఎన్‌ అంబులెన్స్‌ సర్వీస్‌ డైరెక్టర్‌ అబ్దికదర్‌ అబ్దిరహమాన్‌ తెలిపారు. మృతుల సంఖ్య మరింత పెరిగే అవకాశం ఉంది. ఇప్పటి వరకు ఈ దాడికి సంబంధించి బాధ్యత వహిస్తూ ఎవరూ ఎటువంటి ప్రకటన జారీ చేయలేదు. భద్రతా సిబ్బంది ఘటనా స్థలానికి చేరుకొని సహాయచర్యలు చేపట్టారు.