27 ఏళ్ళ ఓ కారు డ్రైవర్‌, తన కారులో ఇద్దరు మహిళల్ని బంధించిన కేసుపై విచారణ జరుగుతోంది. అల్‌ బర్షా పోలీస్‌ స్టేషన్‌ పరిధిలో ఈ ఘటన చోటు చేసుకుంది. తనకు చెల్లించాల్సిన 20 దిర్హామ్‌లు చెల్లించనందుకుగాను తాను వారిని బంధించవలసి వచ్చిందని కారు డ్రైవర్‌ కోర్టుకి తెలిపాడు. అయితే బాధితుల వెర్షన్‌ ఇంకోలా ఉంది. మీటర్‌ వెయ్యకుండా కారుని నడుపుతున్నందున తాము, డ్రైవర్‌ని ప్రశ్నించామని అయితే ఈ క్రమంలో తమతో డ్రైవర్‌ వాగ్వాదానికి దిగాడని వారు అంటున్నారు. ఈ ఘటనలో ప్రత్యక్ష సాక్షి అయిన ఓ గార్డ్‌ మాట్లాడుతూ, తమ సంస్థలో పనిచేసే రిసెప్షనిస్ట్‌ తమ కార్యాలయం బయట కారులో వాగ్వాదం జరుగుతున్న విషయాన్ని తన దృష్టికి తీసుకురావడంతో అక్కడికి వెళ్ళానని చెప్పాడు. తాను వెళ్ళే సరికి కారులో మహిళలు ఉన్నారని, డబ్బు చెల్లించకపోవడంతోనే వారిని కారులో ఉంచానని డ్రైవర్‌ చెప్పినట్లు గార్డు, న్యాయస్థానానికి తెలిపాడు. బాధిత మహిళల్లో ఒకరు, డబ్బు సమస్య కాదని డ్రైవర్‌ వేధిస్తున్నట్లు చెప్పినట్లు వివరించాడు. ఈ కేసులో తదుపరి విచారణ జనవరి 10న జరుగుతుంది.