సినీ నటుడు, రాజ్యసభ ఎంపీ మిథున్‌ చక్రవర్తి సోమవారం రాజ్యసభ సభ్యత్వానికి రాజీనామా చేస్తున్నట్టు ప్రకటించారు. అనారోగ్య కారణాల వల్లే రాజీనామా చేసినట్లు సమాచారం. ఆయన రాజీనామాను టీఎంసీ నేత డెరెక్‌ ఒబ్రెయిన్‌ ధ్రువీకరించారు. ఆయనతో సత్సంబంధాలు ఎప్పటికీ కొనసాగిస్తామని, త్వరగా కోలుకొని పూర్తి ఆరోగ్యంతో ఉండాలని కోరుకుంటున్నట్లు ఒబ్రెయిన్‌ తెలిపారు.

2014 ఏప్రిల్‌లో పశ్చిమ్‌ బంగాలోని తృణమూల్‌ కాంగ్రెస్‌ పార్టీ తరపున మిథున్‌ చక్రవర్తి రాజ్యసభకు ఎంపికయ్యారు. రాజ్యసభ సమావేశాల సమయంలో ఆయన రెండేళ్లలో కేవలం మూడు రోజుల పాటే సమావేశాలకు హాజరవడంపై తీవ్ర విమర్శలు ఎదుర్కొన్నారు.డిస్కో డ్యాన్సర్‌గా ఒకప్పుడు యువతరాన్ని ఉర్రూతలూగించిన మిథున్‌ చక్రవర్తి ఇటీవల తెలుగులో పవన్‌ కల్యాణ్‌, వెంకటేశ్‌ నటించిన 'గోపాలగోపాల' చిత్రంలో ప్రతినాయకుడి పాత్రలో కన్పించారు. ఆ చిత్రంలో ఆయన నటనకు గాను విమర్శకుల నుంచి సైతం ప్రశంసల్ని అందుకున్నారు.