హెచ్ 1 బీ వీసాల విషయంలో ట్రంప్ ప్రభుత్వం భారత ఐటీ కంపెనీలకు కాస్త ఊరటనిచ్చింది. 2018 ఆర్ధిక సంవత్సరానికి హెచ్ 1 బీ వర్క్ వీసాలకోసం ఏప్రిల్ 3 నుంచి అభ్యర్థులు దరఖాస్తు చేసుకోవచ్చునని యూఎస్ సిటిజెన్ షిప్ అండ్ ఇమ్మిగ్రేషన్ సర్వీసుల విభాగం ప్రకటించింది. అయితే ఈ అప్లికేషన్లను ఎప్పటివరకు స్వీకరిస్తారో.చివరి తేదీని మాత్రం వెల్లడించలేదు. (2018 ఆర్ధిక సంవత్సరం ఈ ఏడాది అక్టోబరు 1 నుంచి ప్రారంభమవుతుంది). ఏమైనా ఈ ప్రకటన మన దేశ ఐటీ సంస్థలకు, ప్రొఫెషనల్స్ కు కొంతవరకు రిలీఫ్ నిచ్చేదే !
బహుశా ఈ ఏడాది హెచ్ 1 బీ వీసాల ప్రోగ్రాం లో మార్పు ఉండక పోవచ్చుననడానికి ఇది సూచన అని భావిస్తున్నారు. నిజానికి హెచ్ 1 బీ వీసాల నిబంధనలను కఠినతరం చేయాలని ఇద్దరు సెనేటర్లు సెనెట్ కు సమర్పించిన తమ బిల్లులో కోరిన విషయం గమనార్హం.
హెచ్ 1 బీ వీసా ప్రోగ్రాం వల్ల తమ దేశంలోని కంపెనీలు తాత్కాలికంగా విదేశీ సిబ్బందిని నియమించుకోవడానికి వీలవుతుందని యూఎస్ సిటిజెన్ షిప్ అండ్ ఇమ్మిగ్రేషన్ సర్వీసుల అధికారులు పేర్కొంటున్నారు. హెచ్ 1 బీ వీసా దరఖాస్తుల ప్రాసెసింగ్ ప్రక్రియను ఏప్రిల్ 3 నుంచి 6 నెలల పాటు నిలిపివేస్తున్నట్టు ఇటీవల అమెరికా అధికారులు ప్రకటించిన సంగతి తెలిసిందే.