సహజనటిగా తెలుగునాట మన్ననలు అందుకున్న జయసుధ జీవితంలో తాజాగా తీవ్ర విషాదం చోటు చేసుకుంది. ఆమె భర్త నితిన్‌ కపూర్‌ ఇటీవలే మరణించారు. ఈ రోజు (మార్చి 17) జయసుధ పెళ్లి రోజు. 32 ఏళ్ల క్రితం ఇదే రోజున జయసుధ, నితిన్‌కపూర్‌ ఒకటయ్యారు. ఈ సందర్భంగా తన భర్త గురించి జయసుధ ఫేస్‌బుక్‌లో స్పందించింది. 'నా భర్త నితిన్‌ కపూర్‌ ఇప్పుడు దేవతలతో ఉన్నారు. ఎన్నో ఏళ్లుగా ఆయన వెతికిన శాంతి ఇప్పుడు ఆయనకు దొరికింది. డిప్రెషన్‌ అనేది చాలా తీవ్రమైన మెడికల్‌ కండిషన్‌. నా జీవితంలోని ఈ చీకటి కోణాన్ని సంచలనాత్మకం చేయకుండా సంయమనం పాటించిన మీడియాకు నా ధన్యవాదాలు. ఇప్పుడు నా కుటుంబ స్వేచ్ఛకే నా మొదటి ప్రాధాన్యం. 32 ఏళ్ల కిత్రం ఇదే రోజు మా ఇద్దరం ఒకటయ్యాం.
ఆయన సహచర్యంలో గడిపిన మధుర క్షణాలు నాకు గుర్తుకొస్తున్నాయి. ఇప్పుడు ఆయన ఎక్కడున్నా మమ్మల్ని కాపాడుతూనే ఉంటారని నాకు తెలుసు. ఆయన ఆత్మకు శాంతి కలగాలని దేవుణ్ని ప్రార్థిస్తున్నా. ఈ విషాద సమయంలో నాకు, నా కుటంబానికి మద్దతు ప్రకటించిన ప్రతీ ఒక్కరికీ నా ధన్యవాదాలు' అని జయసుధ కామెంట్‌ చేసింది.