చాలా గ్యాప్‌ తరువాత 'కుట్రమ్‌ 23'తో హీరోగా భారీ సక్సెస్‌ అందుకున్న అరుణ్‌ విజయ్‌పై ఇటు ప్రేక్షకుల నుంచి అటు సినీ పరిశ్రమ నుంచి ప్రశంసల జల్లు కురుస్తోంది. అయితే అన్నింటికన్నా తన తండ్రి (విజయ్‌కుమార్‌) ప్రశంసలు తనకెంతో ఆనందాన్నిచ్చాయని, ఆయన మాటలు తనకు గొప్ప అవార్డుతో సమానమని చెన్నైలో నిర్వహించిన సక్సెస్‌ మీట్‌లో అరుణ్‌ విజయ్‌ పేర్కొన్నాడు. ఇటీవలే ఎంజీఆర్‌ డీమ్డ్‌ విశ్వవిద్యాలయంచే గౌరవ డాక్టరేట్‌ అందుకున్న సందర్భంగా విజయ్‌కుమార్‌ను 'కుట్రమ్‌ 23' చిత్ర బృందం గజమాలతో సత్కరించింది. ఆయన సాధించిన విజయాలతో పోలిస్తే తను సాధించింది పది శాతం కూడా లేదని అరుణ్‌ విజయ్‌ తన తండ్రి పట్ల అభిమానాన్ని చాటుకున్నాడు.
కాగా, 'ఈరం' ఫేమ్‌ అరివళగన్ దర్శకత్వంలో మెడికల్‌ క్రైం డ్రామాగా తెరకెక్కిన 'కుట్రమ్‌ 23' తెలుగులోను విడుదలయ్యేందుకు సిద్ధమవుతోంది.