వివాదాస్పద ట్వీట్లతో మంచి ఇమేజ్ సొంతం చేసుకున్న సంచలన దర్శకుడు రామ్‌గోపాల్ వర్మ ఆరోగ్య పరిస్థితి చాలా సీరియస్‌గా ఉందట. ప్రస్తుతం వర్మను ఐసీయూలో ఉంచి చికిత్స అందిస్తున్నారట వైద్యులు. అయితే వర్మకు సోకిన వ్యాధికి ఏ మందులు ఇవ్వాలో కూడా వైద్యులకు అంతుపట్టడం లేదట. ఇదేదో జోక్ అనుకుంటున్నారా? ఇది జోక్ కాదండి బాబూ.. ఈ విషయాన్ని స్వయంగా వర్మే వెల్లడించాడు. అదేంటీ.. ఎప్పుడూ హాట్‌హాట్‌ ట్వీట్లతో అలరించే వర్మకు ఏమైందనే కదా మీ సందేహం. వర్మకు ఓ ప్రమాదకరమైన వైరస్ సోకిందట. ఆ వైరస్ పేరు బాహుబలి-2 జలసైటిస్ అట. ఇదేంటంటారా..? దర్శకుడు రాజమౌళి రూపొందించిన బాహుబలి-2 చూసి విపరీతంగా అసూయకు గురవడం వల్లే వర్మకు ఈ వైరస్ సోకిందట. అందుకే వెంటనే హాస్పిటల్‌కు పరిగెత్తాడట. అయితే ట్రీట్‌మెంట్ కోసం హాస్పిటల్‌కు వెళ్లిన వర్మ అక్కడ పరిస్థితి చూసి షాకయ్యాడట. ఎందుకంటే.. అప్పటకే ఇండియన్ స్టార్ డైరెక్టర్లందరూ తనలాగే వైరస్ ఇన్ఫెక్షన్‌తో బాధపడుతూ ఐసీయూలో చేరిపోయి చికిత్స పొందుతూ కనిపించారట.