కొరియా ద్వీపకల్ప తీరానికి మరో విమాన వాహకనౌక యుఎస్‌ఎస్‌ రోనాల్డ్‌ రీగన్‌ను తరలించేందుకు అమెరికా నౌకాదళం సిద్ధమయింది. ఈ నౌక ఇప్పటికే కొరియా తీరంలో మకాం చేసిన యుఎస్‌ఎస్‌ కార్ల్‌ విన్సన్‌ నౌకతో కలిసి సైనిక విన్యాసాలు కొనసాగి స్తుందని అమెరికా రక్షణశాఖ అధికారులు వెల్లడించారు. జపాన్‌లోని యొకోసుకా రేవులో మరమ్మతు నిర్వహణా పనులను, సముద్రపు ట్రయల్స్‌ను పూర్తి చేసుకున్న ఈ నౌక మంగళవారం నాడు కొరియా తీరానికి బయల్దేరిం దని రియర్‌ అడ్మిరల్‌ ఛార్లెస్‌ విలియమ్స్‌ వివరించారు.
విస్తృత స్థాయిలో విన్యాసాలు 
కొరియా తీరానికి చేరుకున్న తరువాత ఈ నౌక విస్తృత స్థాయిలో సైనిక విన్యాసాలు నిర్వహిస్తుందని, అయితే ప్రాథమికంగా యుద్ధ విమానాల టేకాఫ్‌, లాండింగ్‌ వంటి అంశాల విషయంలో నౌక సామర్ధ్యాన్ని పరీక్షిస్తారని ఈ ప్రకటనలో వివరించారు. 1,092 అడుగుల పొడవున్న రీగన్‌ నౌకలో 4,539 మంది సిబ్బందితో పాటు 60 యుద్ధ విమానాలు వుంటాయని నౌకాదళ అధికారులు చెబుతున్నారు.