రియాద్‌: పెనాల్టీ లేకుండా ఉల్లంఘనులైన వలసదారులు దేశం విడిచి వెళ్ళేందుకు ఇప్పటికే ప్రకటించిన క్షమాభిక్ష ఇటీవల ముగియగా, దాన్ని మరో 30 రోజులకు పొడిగిస్తూ నిర్ణయం తీసుకున్నారు. జూన్‌ 25 నుంచి ఈ పొడిగింపు అమల్లోకి వచ్చింది. రెసిడెన్సీ, లేబర్‌ చట్టాల ఉల్లంఘనలకు సంబంధించి ఈ అమ్నెస్టీని ప్రకటించారు. 'ఉల్లంఘనలు లేని దేశం' అనే నినాదంతో ఈ క్షమాభిక్షను ప్రసాదించినట్లు జనరల్‌ డైరెక్టరేట్‌ ఆఫ్‌ పాస్‌పోర్ట్స్‌ వెల్లడించింది. మార్చి 29 నుంచి క్షమాభిక్ష పీరియడ్‌ ప్రారంభమైంది. 90 రోజులకుగాను తొలుత ఈ క్షమాభిక్ష ప్రకటించారు. దాన్ని మరో 30 రోజులకు తాజాగా పొడిగించడం జరిగింది. మినిస్టర్‌ ఆఫ్‌ ఇంటీరియర్‌ ప్రిన్స్‌ అబ్దుల్‌ అజీజ్‌ బిన్‌ సౌద్‌ బిన్‌ నయీఫ్‌ సూచనల మేరకు 30 రోజుల కొత్త క్షమాభిక్షను అమలు చేస్తున్నట్లు అధికారులు వెల్లడించారు.