ఐసీసీ మహిళల వన్డే ప్రపంచకప్‌లో అద్భుత ప్రదర్శన కనబరిచిన భారత మహిళల జట్టు సారథి మిథాలీరాజ్‌కు తెలంగాణ బ్యాడ్మింటన్‌ అసోసియేషన్‌ అధ్యక్షుడు చాముండేశ్వరినాథ్‌ బీఎండబ్ల్యూ కారును కానుకగా అందజేశారు. గోపీచంద్‌ అకాడమీలో ఏర్పాటు చేసిన కార్యక్రమంలో చాముండేశ్వరినాథ్‌.. మిథాలీ రాజ్‌కి కారు తాళాలు అందించారు. ఇంగ్లాండ్‌లో ప్రపంచకప్‌లో భారత్‌ సెమీఫైనల్లో విజయం సాధించిన అనంతరం చాముండేశ్వరినాథ్‌.. సారథి మిథాలీకి బీఎండబ్ల్యూ కారును అందజేస్తానని వెల్లడించిన విషయం తెలిసిందే. ఈ నేపథ్యంలో మంగళవారం గోపిచంద్‌ అకాడమీలో ఏర్పాటు చేసిన కార్యక్రమంలో ఆయన మిథాలీకి కారును అందజేశారు. 2016లో రియో ఒలింపిక్స్‌లో పతకాలు గెలిచిన పీవీ సింధు, సాక్షి మాలిక్‌, తృటిలో పతకం చేజార్చుకున్న దీప కర్మాకర్‌, సింధు కోచ్‌ గోపిచంద్‌కి చాముండేశ్వరినాథ్‌ మాస్టర్‌ బ్లాస్టర్‌ సచిన్‌ తెందుల్కర్‌ చేతుల మీదుగా బీఎండబ్ల్యూ కార్లు అందజేసిన సంగతి తెలిసిందే.