లైంగిక వేధింపులకు సంబంధించిన ఆరోపణలతో అమెరికాలో విజకుమార్‌ కృష్ణప్ప అనే 28 ఏళ్ల భారత వైద్యుడిని అక్కడి పోలీసులు అరెస్టు చేశారు. జులై 23న న్యూజెర్సీకి పయనమైన యునైటెడ్‌ ఎయిర్‌లైన్స్‌ విమానంలో.. తాను నిద్రించి ఉండగా పక్క సీట్లో ఉన్న కృష్ణప్ప పలుమార్లు అసభ్యంగా తాకాడని 16 ఏళ్ల బాలిక ఆరోపించింది. విమాన సిబ్బందికి ఈ విషయం చెప్పి.. తన సీటు మార్పించుకున్నట్లు పేర్కొంది. ఇటు ప్రయాణ అనంతరం ఆమె కుటుంబం ఈ ఘటనపై ఫిర్యాదు చేసింది. అమెరికా దర్యాప్తు సంస్థ ఎఫ్‌బీఐ కృష్ణప్పపై కేసు నమోదు చేసింది. మైనర్‌పై లైంగిక వేధింపులకు సంబంధించిన ఆరోపణలతో కృష్ణప్పను అరెస్టు చేసినట్లు నెవార్క్‌ ఫెడరల్‌ కోర్టు రికార్డులు పేర్కొన్నాయి. బాండుపై ఆయనను విడుదల చేసి.. ఎలక్ట్రానిక్‌ పర్యవేక్షణలో ఉంచినట్లు తెలిపాయి. ఇటు కృష్ణప్ప తరఫు న్యాయవాది ఈ ఆరోపణలను తోసిపుచ్చారు.