భారతదేశ ప్రథమ పౌరుడి భద్రతా సిబ్బందికి నాలుగేళ్లలో రూ.155.4కోట్లు జీతంగా ఇచ్చినట్లు రాష్ట్రపతి భవన్‌ డిప్యూటీ కమిషనర్‌ ఆఫ్‌ పోలీస్‌ వెల్లడించారు. లఖ్‌నవూకి చెందిన సామాజిక కార్యకర్త న్యూటన్‌ ఠాకూర్‌ ఆర్టీఐ(సహచట్టం) కింద అడిగిన ప్రశ్నకు బదులుగా ఆయన ఈ విషయాన్ని వెల్లడించారు. 2014-15 సంవత్సరానికిగాను రాష్ట్రపతి భద్రతా సిబ్బందికి రూ.38.17కోట్లు జీతంగా ఇచ్చినట్లు పేర్కొన్నారు. 2015-16లో రూ.41.77కోట్లు, 2016-17లో రూ.48.35కోట్లు, 2017-18లో రూ.27.11కోట్లు జీతాలుగా చెల్లించారు.ఈ నాలుగేళ్లలో భద్రతా సిబ్బంది ఉపయోగించే వాహనాల నిర్వహణ కోసం రూ.64.9లక్షలు ఖర్చు పెట్టారు. 2014-15లో రూ.15.5లక్షలు, 2015-16లో రూ.20లక్షలు, 2016-17లో రూ.21.8లక్షలు, 2017-18లో రూ.7.5లక్షలు వెచ్చించారు. అయితే.. ప్రభుత్వ పెట్రోల్‌ బంకుల నుంచే ఇంధనాన్ని ఉపయోగించినందు వల్ల ఈ వ్యయంలో వాహన ఇంధనాలకు అయిన ఖర్చును మాత్రం కలపలేదు. ఎంత మంది భద్రతా సిబ్బంది ఉంటారు, ఎన్ని ప్రభుత్వ వాహనాలను ఉపయోగిస్తున్నారనే ప్రశ్నకు సమాధానం ఇచ్చేందుకు రాష్ట్రపతి భవన్‌ డీసీపీ నిరాకరించారు. భద్రతా కారణాల దృష్ట్యా ఆ వివరాలను వెల్లడించలేమని ఆయన పేర్కొన్నారు.