తమిళనాడులో మరో అనూహ్య పరిణామం చోటు చేసుకుంది. జయ టీవీ ఆఫీస్‌పై ఉన్నట్లుండి ఐటీ సోదాలు ఈ ఉదయం నుంచి మొదలయ్యాయి. పన్ను ఎగ్గొట్టారన్న ఆరోపణలపై సోదాలు చేస్తున్నారు ఆదాయపు పన్ను శాఖ అధికారులు. ట్యాక్స్ మాయాజాలంపై కూపీ లాగుతున్నారు. మొన్న కరుణానిధి కుటుంబాన్ని ప్రధాని మోడీ కలవడం..., పళనిస్వామి, పన్నీర్ సెల్వంకు దూరం పాటించడం ఒక పరిణామంగా మారితే.. తాజాగా జయలలిత, అన్నాడీఎంకేకు సంబంధించిన జయ టీవీపై ఐటీ సోదాలు తీవ్ర చర్చనీయాంశంగా మారింది. అయితే జయ టీవీ ఆర్థిక వ్యవహారాలు శశికళ వర్గం ఆధీనంలో ఉన్నట్లు తెలుస్తోంది. ఈ కారణంగానే ఐటీ సోదాలకు దిగిందని చెబుతున్నారు.