బీరట్‌: లెబనాన్‌ ప్రధాని సాద్‌ హరిరి ఇటీవల ఆకస్మిక రాజీనామా చేసిన విషయం తెలిసిందే. అప్పట్నుంచీ ఆయన ఎక్కడ ఉన్నారనే విషయాలు తెలియడం లేదు. దీంతో లెబనాన్‌ వాసులు ఆందోళనకు గురవుతున్నారు. మరోవైపు హరిరి సౌదీ అరేబియాలో కిడ్నాప్‌కు గురయ్యారంటూ వదంతులు రావడంతో లెబనాన్‌ అధ్యక్షుడు మైఖెల్‌ అవాన్‌ సౌదీ అరేబియాతో సంప్రదింపులు జరిపారు. తమ ప్రధాని ఇంతవరకూ స్వదేశానికి ఎందుకు తిరిగిరాలేదో చెప్పాలని కోరారు.
ఇటీవల సౌదీ అరేబియాలో పర్యటించిన హరిరి నవంబర్‌ 4న రియాద్‌లోని ఓ టెలివిజన్‌ ఛానల్‌ ద్వారా మాట్లాడుతూ తన రాజీనామాను ప్రకటించారు. ప్రస్తుతం లెబనాన్‌పై ఇరాన్‌ ఆధిపత్యం ప్రదర్శిస్తోందని.. అంతేగాక తన ప్రాణానికి ముప్పు ఉందని, తండ్రిలాగే తనను కూడా చంపేస్తారేమోనని ఆందోళన వ్యక్తంచేశారు. ఆ తర్వాత ఆయన లెబనాన్‌ తిరిగి వెళ్లలేదు. దీంతో ఆయన వివరాలు తెలియడం లేదు.
మరోవైపు సౌదీలో హరిరి కిడ్నాప్‌కు గురయ్యారంటూ వదంతులు వ్యాపిస్తున్నాయి. దీంతో ఈ విషయమై లెబనాన్‌ అధ్యక్షుడు మైఖెల్‌ అవాన్‌ సౌదీ రాజుతో మాట్లాడారు. హరిరి ఇంతవరకూ ఎందుకు తిరిగిరాలేదో తెలుసుకోవాలని కోరారు. కాగా.. హరిరి రాజీనామాను అవాన్‌ ఇంకా ఆమోదించలేదు.