సిరియా: ఐఎస్‌ ఉగ్రవాదులే లక్ష్యంగా సిరియాలో జరుగుతున్న వైమానిక దాడులతో అమాయకులు మృత్యువాత పడుతూనే ఉన్నారు. శనివారం రష్యా వైమానిక దళం తూర్పు సిరియాలో జరిపిన దాడుల్లో 9 మంది చిన్నారులతో పాటు 26 మంది పౌరులు మృతి చెందినట్లు మానవహక్కుల సంఘాలు ప్రకటించాయి. అల్బూ కమాల్‌ పట్టణ పరిసర ప్రాంతాల్లో జరిగిన దాడుల్లో వీరంతా ప్రాణాలు కోల్పోయినట్లు తెలుస్తోంది. ఐఎస్‌ ఉగ్రవాదుల చెర నుంచి వివిధ ప్రాంతాలను విముక్తి చేస్తూ వస్తున్న సైన్యం.. రెండు రోజుల క్రితం అల్బూకమాల్‌పై దాడులు ప్రారంభించింది. ఉగ్రవాదులు ప్రతిఘటించగా రష్యా సైన్యం వైమానిక దాడులు చేపట్టింది. అల్‌సుఖారియా ప్రాంతంలో ఓ పునరావాస కేంద్రంపై బాంబులు పడగా ఏడుగురు చిన్నారులు సహా 15 మంది చనిపోయారని, అల్బూ కమాల్‌కు 50 కిలోమీటర్ల దూరంలోని ఓ గ్రామంలో ఇద్దరు చిన్నారులతో పాటు మరో 11 మంది మృత్యువాత పడ్డారని మానవహక్కుల సంఘాలు తెలిపాయి. 2011 నుంచి సిరియాలో జరుగుతున్న అంతర్యుద్ధంలో దాదాపు 30.30లక్షల మంది కన్నుమూసినట్లు తెలుస్తోంది.