వాషింగ్టన్‌: 'ప్రపంచ అత్యుత్తమ ఆలోచనాపరుల జాబితా'లో.. భారతీయ అమెరికన్‌ కమలా హ్యారిస్‌ అగ్రస్థానం సాధించారు. ప్రఖ్యాత 'ఫారిన్‌ పాలసీ' మ్యాగజైన్‌ 2017కు గానూ 50 మంది పేర్లతో కూడిన ఈ జాబితాను ప్రకటించింది. అమెరికాలో డొనాల్డ్‌ ట్రంప్‌ పాలన సాగుతున్న సమయంలో.. ప్రతిపక్ష డెమోక్రటిక్‌ పార్టీకి కమలా ఆశాజ్యోతిగా నిలిచారంటూ మ్యాగజైన్‌ వర్ణించింది. ప్రస్తుతం కమలా కాలిఫోర్నియా రాష్ట్రానికి సెనేటర్‌గా ఉన్నారు. ఇటు భారత సంతతికి చెందిన హాస్యకారుడు హసన్‌ మిన్హాజ్‌, రాజకీయ నాయకురాలు నిక్కీ హేలీలు కూడా ఈ జాబితాలో చోటు సంపాదించారు. హసన్‌కు జాబితాలో మూడో స్థానం దక్కింది.

అంతర్జాతీయ వ్యవహారాల పట్ల అమెరికా సంప్రదాయ దార్శనికతను హేలీ కాపాడుతున్నారని 'ఫారిన్‌ పాలసీ' కొనియాడింది. ఐరాసకు అమెరికా రాయబారిగా నియమితురాలైన హేలీ.. అధ్యక్ష కేబినెట్‌లో సభ్యత్వం దక్కించుకున్న తొలి భారతీయ అమెరికన్‌గా ఘనత సాధించారు.