మోన్ స్టర్ ఎంప్లాయిమెంట్ ఇండెక్స్ (MEI) వారి తాజా గణాంకాల  ప్రకారం, గల్ఫ్ ప్రాంతంలో ఆన్ లైన్ లో ప్రకటించ బడుతున్న ఉద్యోగాల పెరుగుదల రేటు - సెప్టెంబర్ 2015 లో 24 శాతం కాగా, అక్టోబరు 2015 లో 14 శాతం ఉంది. అంటే ఇంచుమించు 50 శాతం తక్కువగా ఉన్నా,  కొన్ని రంగాలలో నిపుణులకు ముఖ్యంగా, యు.ఎ. ఈ. లో డిమాండు తగ్గలేదు సరికదా మరింత ఎక్కువయిందని తెలియవచ్చింది. మధ్య ప్రాచ్యంలో ఆన్ లైన్ జాబ్ పోస్టింగ్ ను నెలవారీగా అంచనా వేసే MEI యొక్క మేనేజింగ్ డైరక్టర్ (భారత్,మధ్య ప్రాచ్యం, ఆగ్నేయాసియ మరియు హాంగ్ కాంగ్) ఐన సంజయ్ మోడీ తెలియజేసిన సమాచారం ప్రకారం, త్రైపక్షిక మరియు అర్ధ వార్షిక అభివృద్ధి రేటు కూడా తక్కువగానే ఉంది.  బ్యాంకులు మరియు ఆర్ధిక వ్యవహారాలు, ఐ. టి. మరియు టెలికం , విద్య, చమురు మరియు సహజ వాయు రంగాలు దిగాలుగా ఉండగా, హెచ్. అర్. మరియు పరిపాలనా, ఆరోగ్య రంగాలలో చక్కని పెరుగుదలను సూచిస్తున్నాయని, ఆయా రంగాలలో నిపుణులకు బ్రహ్మాండమైన డిమాండు ఉందని ఆయన తెలిపారు.