నందమూరి కళ్యాణ్‌రామ్‌ కథానాయకుడిగా నూతన దర్శకుడు ఉపేంద్ర మాధవ్ దర్శకత్వంలో రూపొందుతోన్న ఫుల్ లెంగ్త్ ఎంటర్‌టైనర్‌ మూవీ 'ఎంఎల్‎ఏ'. 'మంచి లక్షణాలు ఉన్న అబ్బాయ్' అనేది కాప్షన్. ఈ చిత్రంలో అందాల భామ కాజల్ హీరోయిన్‎గా నటిస్తున్నారు. టిజి. విశ్వప్రసాద్ సమర్పణలో, బ్లూ ప్లానెట్ ఎంటర్టైన్మెంట్స్ LLP మరియు పీపుల్ మీడియా ఫ్యాక్టరీ LLP బ్యానర్‎ల సంయుక్త నిర్మాణంలో ఈ చిత్రం రూపొందుతోంది. ఈ చిత్రానికి మెలోడీ బ్రహ్మ మణిశర్మ సంగీతాన్ని అందిస్తున్నారు.

తాజాగా భోగి పండుగను పురస్కరించుకొని ఈ చిత్ర టీజర్ బయటకు వదిలింది చిత్రయూనిట్. టీజర్ ప్రారంభంలోనే 'వస్తున్నాడు.. వచ్చేస్తున్నాడు మన అందరి ఆశాజ్యోతి ఆంధ్రజ్యోతి.. ఈనాడు.. సాక్షి.. నమస్తే తెలంగాణా' అనే డైలాగ్ వస్తుండగా నందమూరి కళ్యాణ్ రామ్ నమస్కారం చేస్తూ దర్శనమిస్తున్నాడు.

టీజర్ చూస్తుంటే ఓ డిఫెరెంట్ లుక్ లో కళ్యాణ్ రామ్ బాగా ఆకట్టుకుంటాడని తెలుస్తోంది. టాకీ పార్ట్ మొత్తాన్ని పూర్తి చేసుకున్న ఈ చిత్రం, వచ్చే నెల ఫారిన్ షెడ్యూల్‎లో పాటల చిత్రీకరణతో షూటింగ్ మొత్తాన్ని పూర్తి చేసుకుంటుంది.