హైదరాబాద్‌ : మెగాస్టార్‌ చిరంజీవి హీరోగా ప్రతిష్టాత్మకంగా తెరకెక్కుతున్న సైరా మూవీ సెట్స్‌లోకి సూపర్‌స్టార్‌ అమితాబ్‌ బచ్చన్‌ ఎంట్రీ ఇవ్వనున్నారు. సైరాలో ఓ కీలక పాత్రలో నటిస్తున్న అమితాబ్‌ త్వరలోనే మెగాస్టార్‌తో కలిసి మూవీ షూటింగ్‌లో పాలుపంచుకోనున్నారు. ఖైదీ నెంబర్‌ 150 ద్వారా టాలీవుడ్‌లో రీఎంట్రీ  ఇచ్చిన చిరంజీవి స్వాతం‍త్ర సమరయోధుడు ఉయ్యాలవాడ నరసింహారెడ్డి బయోపిక్‌లో నటిస్తున్న సంగతి తెలిసిందే. అమితాబ్‌ ఈ మూవీలో నటిస్తున్నారని, త్వరలోనే ఆయన షూటింగ్‌లో పాల్గొంటారని యూనిట్‌ వర్గాలు పేర్కొన్నాయి.

మూవీలో అమితాబ్‌ ఏ పాత్ర పోషిస్తున్నారనేది ఇప్పుడే వెల్లడించలేమని ఆ వర్గాలు తెలిపాయి. మరోవైపు సైరాలో అమితాబ్‌ కోడలు ఐశ్వర్యారాయ్‌ హీరోయిన్‌గా నటించే అవకాశం ఉందని ఊహాగానాలు వెలువడినా చిత్ర యూనిట్‌ నయనతారను చిరుకు జోడీగా ప్రకటించి రూమర్లకు చెక్‌ పెట్టింది. సురేందర్‌ రెడ్డి దర్శకత్వంలో తెరకెక్కుతున్న సైరా మూవీని చిరు తనయుడు రామ్‌చరణ్‌ కొణిదెల ప్రొడక్షన్స్‌ పతాకంపై నిర్మిస్తున్నారు.