ప్రముఖ కథానాయకుడు శ్రీకాంత్ చిన్న కుమారుడు రోహన్ సైతం వెండితెరపైకి వచ్చేస్తున్నాడు. ఏకంగా త్రిభాషా చిత్రంతో మాస్టర్ రోహన్ సిల్వర్ స్ర్కీన్ ఎంట్రీ ఇస్తుండటం విశేషం.

ప్రముఖ హీరోహీరోయిన్లు శ్రీకాంత్, ఊహ దంపతులు ఏ ముహూర్తాన ప్రేమ వివాహం చేసుకున్నారో కానీ వారి పిల్లలు సైతం నటనకే అంకితమైపోతున్నారు. శ్రీకాంత్ కుమార్తె మేధ, కుమారుడు రోషన్ బాలనటులుగా 'రుద్రమదేవి' చిత్రంలో నటించారు. ఇక రోషన్ అయితే ఓ అడుగు ముందుకేసి 'నిర్మల కాన్వెంట్' చిత్రంలో ఏకంగా హీరోగానూ నటించి మెప్పించాడు. ఇప్పుడు శ్రీకాంత్, ఊహ చిన్న కొడుకు రోహన్ సైతం వెండితెరకు పరిచయం అవుతున్నాడు.

పాపులర్ కొరియోగ్రాఫర్, యాక్టర్ కమ్ డైరెక్టర్ ప్రభుదేవా నటిస్తున్న ఓ త్రిభాషా చిత్రంలో శ్రీకాంత్ చిన్నకుమారుడు రోహన్ నటిస్తున్నాడు. ప్రభుదేవా, రోహన్ తండ్రీకొడుకులుగా నటించే ఈ సినిమా హిట్ స్టేషన్ బ్యాక్ డ్రాప్‌లో తెరకెక్కబోతోంది. ఇటీవలే ఊటీలో ఈ సినిమా షూటింగ్ ప్రారంభమైంది. తెలుగు, తమిళ, హిందీ భాషల్లో పేషన్ ఫిలిమ్స్ సంస్థ నిర్మిస్తున్న ఈ సినిమా ద్వారా ఆకాశ్ దర్శకుడిగా పరిచయం అవుతున్నాడు. తండ్రీకొడుకుల అనుబంధాన్ని తెలిపే ఈ ఫ్యామిలీ డ్రామాలో కాస్తంత హారర్ ఎలిమెంట్ కూడా ఉందని తెలుస్తోంది.

విశేషం ఏమంటే శ్రీకాంత్ నటించిన తొలి హారర్ ఫిల్మ్ 'రా.. రా' ఈ నెల 23న విడుదల కాబోతోంది. మరి శ్రీకాంత్‌కు ఎలాంటి పుత్రోత్సాహాన్ని చిన్న కుమారుడు అందిస్తాడో చూడాలి.