నటసింహం బాలకృష్ణ తీయబోతున్న NTR సినిమా ఈనెల 29న ప్రారంభం కాబోతోంది. ఈ విషయాన్ని బాలయ్య స్వయంగా చెప్పారు. అసెంబ్లీ సమావేశాలకు హాజరయ్యేందుకు అమరావతి వచ్చిన ఆయన.. మీడియాతో చిట్‌చాట్ చేశారు. హైదరాబాద్‌లోని రామకృష్ణ సినీ స్టూడియోస్‌లో సినిమా ప్రారంభిస్తామని బాలయ్య చెప్పారు. 2019 సంక్రాంతికి విడుదల అవుతుందన్నారు. అలాగని.. ఎన్నికల సందర్భంగా తీస్తున్న సినిమా కాదన్నారాయన.

నందమూరి తారక రామారావు జీవితచరిత్ర ఆధారంగా తీస్తున్న సినిమా కాబట్టి.. చాలా జాగ్రత్తలు తీసుకుంటున్నట్టు బాలయ్య చెప్పారు. టైటిల్‌కు చాలామంది చాలా పేర్లు సూచించారని.. NTRకు మించిన  పేరు లేదని భావించామని అన్నారు. NTRను పార్టీలకు అతీతంగా అందరూ అభినందించారని బాలయ్య గుర్తుచేశారు. కొన్నాళ్ల క్రితం భుజానికి శస్త్రచికిత్స చేయించుకున్న బాలకృష్ణ.. ఆ కట్టుతోనే అసెంబ్లీకి వచ్చారు. ఆయన్ని ఎమ్మెల్యేలంతా పరామర్శించారు. తగిలిన ఎన్నో దెబ్బలతో పోల్చితే ఇది పెద్ద దెబ్బ కాదని చెప్పిన బాలకృష్ణ.. ఈ నెల 31, ఏప్రిల్ 1 న లేపాక్షి ఉత్సవాలు నిర్వహిస్తాం అని చెప్పారు.