వాషింగ్టన్‌: అమెరికా అధ్యక్షుడు ట్రంప్‌కు రష్యా అధ్యక్షుడు పుతిన్‌ బహుమతిగా ఇచ్చిన ఫుట్‌బాల్‌ను కూడా పూర్తిస్థాయిలో తనిఖీలు చేస్తామని నేషనల్‌ ఇంటెలిజెన్స్‌ డైరెక్టర్‌ డాన్‌ కోట్స్‌ తెలిపారు. ఇటీవల ట్రంప్‌-పుతిన్‌లు ఫిన్లాండ్‌ రాజధాని హెల్సింకిలో భేటీ అయ్యారు. ఈ సందర్భంగా జరిగిన జాయింట్‌ ప్రెస్‌ కాన్ఫరెన్స్‌లో సిరియా అంశంలో ఉమ్మడి సహకారంపై ట్రంప్‌ మాట్లాడుతుండగా.. ఓ మీడియా ప్రతినిధి కల్పించుకొని ఒక వేళ 'బంతి రష్యా కోర్టులో ఉందా..?' అని పుతిన్‌ను అడిగాడు. దీనికి పుతిన్‌ స్పందిస్తూ '' వాస్తవానికి మేము వరల్డ్‌ కప్‌ను విజయవంతంగా పూర్తి చేశాం అని ఇప్పుడే ట్రంప్‌ చెప్పారు. '' అని అన్నారు. వేదిక పక్కకు వెళ్లి 2018 వరల్డ్‌ కప్‌ సాకర్‌ బాల్‌ ఒకటి తీసుకొచ్చి'' మిస్టర్‌ ప్రెసిడెంట్‌ ఈ బంతిని మీకు ఇస్తున్నాను. బాల్‌ ఇప్పుడు మీ కోర్టులో ఉంది.' అంటూ దానిని ట్రంప్‌కు అందజేశారు. బంతిని అందుకున్న తర్వాత ట్రంప్‌ స్పందిస్తూ '' ఇది మా అబ్బాయి బారన్‌ (12) వద్దకు వెళుతుంది.'' అని కింద ఉన్న సహాయకుల వైపునకు విసిరారు. ఈ ఘటనపై అమెరికా సెనెటర్‌ లిండ్సే గ్రహం స్పందిస్తూ '' అదే నేను అయితే ఆ బంతిలో ఏమైనా వినికిడి సాధనాలను అమర్చారేమో వెతుకుతాను. ఈ బంతిని వైట్‌హౌస్‌లోకి ఎప్పటికీ అనుమతించను.'' అని పేర్కొన్నారు. ఈ ఘటనపై అమెరికా అధ్యక్షుడి భద్రతా వ్యవహారాలను చూసే సీక్రెట్‌ సర్వీస్‌ ఏజెన్సీ స్పందించింది. 

అధ్యక్షుడికి వచ్చే ప్రతి బహుమతికి భద్రతా పరమైన తనిఖీలు నిర్వహిస్తామని తెలిపారు. ఈ ఘటనకు ఒక్కరోజు ముందు పుతిన్‌ ఇటువంటి బంతినే ఖతార్‌ రాజుకు అందజేశారు. 2022 ప్రపంచకప్‌కు ఖతార్‌ ఆతిథ్యం ఇవ్వనుంది. 2026లో అమెరికా, మెక్సికో, కెనడాలు సంయుక్తంగా ప్రపంచకప్‌ను నిర్వహించనున్నాయి.