మలైకా అరోరా తన భర్త అర్బాజ్‌ ఖాన్‌తో విడిపోయిన సంగతి తెలిసిందే. వీరిద్దరికీ ముంబయి కోర్టు విడాకులు జారీ చేసింది. ఈ ఎపిసోడ్ తర్వాత అర్జున్ కపూర్‌, మలైకా అరోరా ప్రేమలో ఉన్నారని కూడా ప్రచారం జరుగుతోంది. వీరు వివాహం చేసుకోబోతున్నారని కూడా బాలీవుడ్ మీడియా కోడైకూస్తుంది. ఏప్రిల్‌ 15న వీరిద్దరూ పెళ్లిపీటలెక్కనున్నట్లు తెలుస్తోంది.

ఇదే విషయాన్ని స్థానిక మీడియా వర్గాలు.. మలైకా మొదటి భర్త అర్బాజ్‌ ఖాన్‌ను అడిగాయి. ఇందుకు అర్బాజ్‌ తనదైన శైలిలో సమాధానం ఇచ్చారు. 'మీరు చాలా తెలివైన ప్రశ్న అడిగారు. రాత్రంతా ఈ విషయం గురించి ఆలోచించి చాలా కష్టపడినట్లున్నారు. ఈ విషయం గురించి నన్ను ప్రశ్నించేందుకు మీరు కొంత సమయం తీసుకున్నారు కదా.. సమాధానం చెప్పడానికి నాకూ కాస్త సమయం ఇవ్వండి' అని మాట దాటేశారు.