దేశంలోకి పెరుగుతున్న వలసలను నిరోధించేందుకు వీలుగా వలసవాసుల కుటుంబ సంబంధాలను నిర్ధారించేందుకు వారికి సత్వర (రాపిడ్‌) డిఎన్‌ఎ పరీక్షలు నిర్వహించాలని అమెరికా సరిహద్దు భద్రతా విభాగం అధికారులు నిర్ణయించారు. తల్లితండ్రులతో చిన్నారుల రక్త సంబంధాన్ని నిర్ధారించుకునేందుకు వలస వాసులకు సత్వర డిఎన్‌ఎ పరీక్షలు నిర్వహించనున్నట్లు హోంశాఖ అధికారులు వెల్లడించారు. ఈ పరీక్షల ప్రక్రియను ఇప్పటికే అమెరికా-మెక్సికో సరిహద్దుల్లో ప్రారంభించామని చెప్పారు. ఈ ప్రాంతంలోనే ప్రతి నెలా ఎక్కువ మంది అక్రమ వలసదారులు సరిహద్దులను దాటి అమెరికాలో ఆశ్రయాన్ని కోరుతుంటారని వారు వివరించారు. కొంతమంది వ్యక్తులు తమకు సంబంధం లేని చిన్నారులను వెంట తీసుకుని అమెరికాలో స్థిరపడేందుకు ప్రయత్నిస్తుంటారని, వారిని నిరోధించేందుకే ఈ పరీక్షలు చేపట్టామని అధికారులు చెప్పారు.