అంకారా: ఈ ఏడాది ఆరంభంలో ఏడేళ్ల పాలస్తీనా చిన్నారులను హత్య చేసిన వారిని సమర్ధిస్తున్న ఇజ్రాయిల్‌, అమెరికాలపై టర్కీ అధ్యక్షుడు రిసెప్‌ తయ్యిప్‌ ఎర్డోగాన్‌ ఆగ్రహం వ్యక్తం చేశారు. ఇజ్రాయిల్‌ను ఎవరు సమర్ధించినా వారిని తాము వ్యతిరేకిస్తామని ఆయన ఒక మీడియా సంస్థకిచ్చిన ఇంటర్వ్యూలో స్పష్టం చేశారు. ఇజ్రాయిల్‌ 'యూదు రాజ్య' చట్టాన్ని అమలులోకి తేవటంపై ఆయన స్పందిస్తూ ఈ చర్యతో కొంతమంది ఇజ్రాయిలీ నేతలలో హిట్లర్‌ స్ఫూర్తి మళ్లీ తలెత్తుతోందనిపిస్తోందని ఆయన వ్యాఖ్యానించారు. టర్కీ రష్యా నుండి ఎస్‌-400 క్షిపణి వ్యవస్థలను కొనుగోలు చేయటంతో ఆ దేశానికి ఎఫ్‌35 యుద్ధ విమానాల విక్రయాలను అమెరికా నిలిపివేసిన విషయం తెలిసిందే. ఈ నేపథ్యంలో ఎర్డొగాన్‌ చేసిన ఈ తాజా వ్యాఖ్యలు ప్రాధాన్యతను సంతరించుకున్నాయి.