కువైట్:సోషల్ మీడియా వేదికగా ఎలాంటి అసత్య ప్రచారాలు, అపోహలు సృష్టించేలా కథనాలు ప్రచారం చేస్తే కఠిన చర్యలు తీసుకుంటామని కువైట్ అధికారులు పదే పదే హెచ్చరిస్తున్నా కొందరు నెటిజన్లు మాత్రం హద్దు దాటుతూనే ఉన్నారు. తాజాగా ప్రవాసీయుల నివాస అనుమతులకు సంబంధించి ఓ సోషల్ మీడియా అకౌంట్ ద్వారా పెద్ద ఎత్తున తప్పుడు ప్రచారం జరుగుతున్నట్లు అధికారులు గుర్తించారు. 40 ఏళ్లకు పైబడిన ప్రవాసీయులకు ఇక నివాస అనుమతులను పునరుద్ధరించరని ఆ కథనాల్లోని సారాంశం. ఈ నిరాధారమైన ప్రచారంపై అధికారులు విచారణ ప్రారంభించారు. అకౌంట్ వివరాలు, దాని నిర్వాహకులు ఎవరో గుర్తించే పనిలో ఉన్నారు. ఉప ప్రధాని అనల్ అల్ సలహ్ సూచనల మేరకు ఎవరైనా అసత్య ప్రచారాలు చేస్తే ఉపేక్షించేది లేదని మరోసారి అధికారులు హెచ్చరించారు. 

--దివాకర్(మాగల్ఫ్ ప్రతినిధి,కువైట్)