అత్యంత సంపన్నుల జాబితాలోని తొలి 50 స్థానాల్లో ముగ్గురు భారతీయులు స్థానం సంపాదించారు. ముఖేష్‌ అంబానీ, అజీమ్‌ ప్రేమ్‌జీ, దిలీప్‌ సంఘ్వీలకు చోటు దక్కింది. ఎప్పటిలాగానే మైక్రోసాఫ్ట్‌ వ్యవస్థాపకుడు బిల్‌గేట్స్‌ 87.4 బిలియన్‌ డాలర్లుతో ప్రథమ స్థానాన్ని సుస్థిరం చేసుకున్నారు. వెల్త్‌-ఎక్స్‌, బిజినెస్‌ ఇన్‌ సైడర్‌ సంయుక్తంగా రూపొందించిన జాబితాను గురువారం వెల్లడించారు. ఈ జాబితాలో ప్రముఖ వ్యాపార వేత్త ముఖేశ్‌ అంబానీ 24.8 బిలియన్‌ డాలర్లతో 27వ స్థానంలో నిలిచారు. విప్రో ఛైర్మన్‌ అజీమ్‌ ప్రేమ్‌జీ 16.5 బిలియన్‌ డాలర్లుతో 43వ స్థానం, సన్‌ ఫార్మాసిటికల్‌ వ్యవస్థాపకుడు దిలీప్‌ సంఘ్వీ 16. 4 బిలియన్‌ డాలర్లుతో 44వ స్థానంలో ఉన్నారు. స్పానిష్‌ వ్యాపారవేత్త అమానికో ఓర్టెగా గవోనా 66.8 బిలియన్‌ డాలర్లు, వారెన్‌ బఫెట్‌ 60.7 బిలియన్‌ డాలర్లతో రెండు మూడు స్థానాల్లో నిలిచారు. అమెజాన్‌ జెఫ్రె- 56.6 బిలియన్‌ డాలర్లు, యూఎస్‌ వ్యాపారవేత్త డేవిడ్‌ కోచ్‌- 47.4 బిలియన్‌ డాలర్లతో నాలుగు, ఐదు స్థానాలు దక్కించుకున్నారు. కొత్త జాబితా ప్రకారం యునైటెడ్‌ స్టేట్స్‌లో 29 మంది బిలియనీర్లు ఉండగా.. చైనా నుంచి నలుగురు బిలియన్లు.. భారతదేశం నుంచి ముగ్గురు బిలియనీర్లు టాప్‌ 50 స్థానాల్లో ఉన్నారు.