రియాద్:మనీ లాండరింగ్ తరహాలో వివిధ దేశాలకు అక్రమ మార్గాల ద్వారా పెద్ద ఎత్తున డబ్బు తరలిస్తున్న సౌదీ గ్యాంగ్ ను పోలీసులు అరెస్ట్ చేశారు. పది మంది సభ్యులు గల ఈ గ్యాంగ్ దాదాపు Sr100 మిలియన్ల డబ్బును అక్రమంగా విదేశాలకు ట్రాన్స్ ఫర్ చేసినట్లు రియాద్ పోలీసులు వెల్లడించారు. చట్టవ్యతిరేక విధానాల్లో సౌదీ నుంచి ఇతర దేశాలకు డబ్బు తరలిస్తున్నట్లు తమకు అందిన సమాచారంతో సౌదీ గ్యాంగ్ కార్యకలాపాలపై క్రిమినల్ ఇన్వెస్టిగేషన్ చేపట్టినట్లు రియాద్ పోలీస్ అధికార ప్రతినిధి కల్నల్ షకర్ అల్ తువైర్జి వెల్లడించారు. ఈ గ్యాంగ్ పెద్ద మొత్తంలో విదేశీ ఖాతాలోకి నగదు బదిలీ చేస్తోందని తమ ఇన్వెస్టిగేషన్ లో నిర్ధారణ అయినట్లు ఆయన ప్రకటించారు. అంతేకాదు..10 మంది సభ్యుల గ్యాంగ్ తమ విచారణలో నేరాన్ని అంగీకరించారని, దాదాపు 10 బోగస్ వ్యాపార సంస్థల ద్వారా నగదు బదిలీ నిర్వహిస్తున్నట్లు పోలీసులు తెలిపారు. ఈ 10 వ్యాపార సంస్థలు వాణిజ్య లావాదేవీలు నిర్వహించేందుకు ఎలాంటి అనుమతులు పొందలేదని కూడా గుర్తించారు.