పాలనలో చిక్కులు, చికాకులు ఎదుర్కొంటున్న తన వియ్యంకుడు ఏపీ సీఎం చంద్రబాబునాయుడు సేఫ్టీ కోసం యాగం, హోం చేయాలని సినీనటుడు, టీడీపీ ఎమ్మెల్యే బాలకృష్ణ నిర్ణయించారట. దీనిపై ఇప్పటికే ఆయన జ్యోతిష్కులతో సంప్రదింపులు జరిపినట్టు తెలిసింది. శుక్రవారం రాత్రి రాహువు.. గురు గ్రహంతో కలిసి సింహలగ్నంలో ప్రవేశించాడని, అది పాలకులకు శుభప్రదం కాదని జ్యోతిష్కులు చెప్పారని తెలిసింది. పైగా గ్రహాల సంచార ఫలితంగా అమరావతి కొత్త రాజధాని నిర్మాణంలో జాప్యం జరగవచ్చునని కూడా అభిప్రాయపడ్డారట.ఈ నేపథ్యంలో జ్యోతిష్యం మీద ఎంతో నమ్మకం వున్న బాలయ్య, ముఖ్యంగా.. చంద్రబాబుకు శుభం జరగాలని కోరుతూ ప్రత్యేక హోమాలు నిర్వహించాలని నిర్ణయించినట్టు తెలుస్తోంది.ఈ హోమ, యాగాలకు పెద్దగా పబ్లిసిటీ ఇవ్వరాదని ఆయన సూచించినట్టు చెబుతున్నారు. గురు-రాహువుల గ్రహాల కలయిక దేశానికి, రాష్ర్టానికీ మంచిదికాదని రాష్ర్ట ప్రభుత్వ ఆగమ సలహాదారు, కాంచీపీఠం ఆస్థాన జ్యోతిష్కుడు ఎల్ సుబ్రమణ్యం సిద్ధాంతి అంటున్నారు. ఈ గ్రహాల వల్ల పాలకులకు మంచి జరగదని, రాజకీయ అనిశ్చితి ఏర్పడవచ్చన్నది ఆయన వివరణ. మంచి జరగాలంటే రాజశ్యామల సంపూతిత పాశుపత మహాయాగం నిర్వహించాలని ఆయన సూచించినట్టు తెలుస్తోంది.