యూఏఈ:విజిట్ వీసాపై యూఏఈలో ఉన్న పర్యాటకులకు ఆ దేశ ప్రభుత్వం కీలక సూచనలు చేసింది. నెల రోజుల్లోగా విజిట్ విసాను రెన్యూవల్ చేసుకోవాల్సిందేనని డెడ్ లైన్ విధించింది. లేదంటే దేశం విడిచి వెళ్లాల్సిందేనని ఆదేశించింది. ఈ నెల 12 నుంచి వీసాలు, గుర్తింపు కార్డులు, నివాస అనుమతుల విషయంలో కొత్త విధివిధానలను అమలులోకి వచ్చిన నేపథ్యంలో యూఏఈ ఈ ప్రకటన చేసింది. కరోనా నేపథ్యంలో అన్ని రకాల వీసాలు, నివాస అనుమతులను ఈ ఏడాది డిసెంబర్ వరకు పొడిగించిన విషయం తెలిసిందే. అయితే..ఇటీవలె సమావేశమైన యూఏఈ మంత్రిమండలి..వీసా గడువుల విషయంలో ఇచ్చిన మినహాయింపులన్నింటిని ఉపసంహరించుకుంది. దీంతో జులై 11 నాటికి వీసాలు, నివాస అనుమతులపై అన్ని రకాల మినహాయింపులు రద్దయిపోయాయి. అయితే..ఇప్పటికే దేశంలో ఉన్న ప్రవాసీయులకు మాత్రం డాక్యుమెంట్ల రెన్యూవల్ కు మూడు నెలల మినహాయింపు ఇచ్చింది. అలాగే లాక్ డౌన్ తో విదేశాల్లోనే చిక్కుకుపోయిన నివాసితులు..యూఏఈకి వచ్చిన నాటి నుంచి నెల రోజుల్లోగా నివాస అనుమతులను రెన్యూవల్ చేసుకునేందుకు అవకాశం కల్పించింది.