మస్కట్:ప్రమాదకరంగా ప్రవహిస్తున్న ఓ కాలువను దాటేందుకు ప్రయత్నించిన ఓ డ్రైవర్ ను రాయల్ ఒమన్ పోలీసులు అరెస్ట్ చేశారు. ఒమన్ లోని నార్త్ షర్కియా గవర్నరేట్ పరిధిలో ఈ ఘటన చోటు చేసుకుంది. పోలీసులు తెలిపిన వివరాల ప్రకారం ముదైంబి విలాయత్ పరిధిలోని ఓ కాలువ ప్రమాదకరంగా ప్రవహిస్తున్నా..ఓ వాహనదారుడు దుస్సాహసం చేసి కాలువ దాటేందుకు వాహనాన్ని తీసుకెళ్లాడని వివరించారు. అతని ప్రాణంతో పాటు తోటివారి ప్రాణాలకు కూడా అపాయం కలిగించేలా వ్యవహరించినందుకు సదరు డ్రైవర్ ను అరెస్ట్ చేసినట్లు వెల్లడించారు. దుస్సాహాసానికి ఒడిగట్టిన డ్రైవర్ పై చట్టపరమైన చర్యలు తీసుకుంటామని రాయల్ ఒమన్ పోలీసులు తెలిపారు.