బహ్రెయిన్: స్థానికులకు ఉపాధి అవకాశాలను పెంచాలన్న విధాన పరమైన నిర్ణయాలతో బహ్రెయిన్ లో విదేశీ కార్మికుల సంఖ్య గణనీయంగా తగ్గుతోంది. పలు కంపెనీలు, పబ్లిక్ సెక్టార్ లలోని ఉద్యోగాలను స్థానికులతోనే భర్తీ చేస్తుండటం ప్రవాసీయులపై ప్రభావం చూపిస్తోంది. దీంతో వాళ్లంతా బహ్రెయిన్ విడిచి వెళ్లిపోతున్నారు. గతేడాది కింగ్డమ్ పరిధిలో 4,77,741 మంది విదేశీ కార్మికులు ఉంటే ఈ ఏడాది ఆ సంఖ్య 4,56,840కి తగ్గినట్లు బహ్రెయిన్ సోషల్ ఇన్సూరెన్స్ గణాంకాలు చెబుతున్నాయి. అదే సమయంలో బహ్రెయినీ ఉద్యోగుల సంఖ్య 1,44, 511కి పెరిగింది. ఇందులో 47,544 మంది పబ్లిక్ సెక్టార్ లో 96,967 మంది ప్రైవేట్ సెక్టార్ లో విధులు నిర్వహిస్తున్నారు. ఇదిలాఉంటే నెలవారి జీతాల విషయంలోనూ బహ్రెయిన్ పౌరులకు, విదేశీ కార్మికులకు మధ్య భారీ వ్యత్యాసం ఉంటున్న విషయం తెలిసిందే. బహ్రెయిన్ పౌరులకు నెల జీతం సగటున 913 దిర్హామ్ లు గా ఉంటే..దాదాపు 3,30,000 మంది కార్మికుల నెల జీతం 200 దిర్హామ్ లుగా ఉంది.