జాతీయ స్థాయి వైమానిక ప్రదర్శనకు హైదరాబాద్ వేదిక కానున్నది. ఇండియన్ ఏవియేషన్ - 2016 సదస్సును మార్చి 16 నుంచి హైదరాబాద్‌లోని బేగంపేట అంతర్జాతీయ విమానాశ్రయంలో నిర్వహించాలని కేంద్ర పౌర విమానయాన మంత్రిత్వశాఖ నిర్ణయించింది. ఈ ప్రదర్శనకు అవసరమైన ఏర్పాట్ల పర్యవేక్షణకు కేంద్ర పౌర విమానయాన మంత్రిత్వశాఖ సంయుక్త కార్యదర్శి అనిల్ శ్రీవాత్సవ సోమవారం హైదరాబాద్‌కు రానున్నారు. ఐదు రోజుల పాటు సాగే వైమానిక ప్రదర్శన ఏర్పాట్లపై ఆయన రాష్ట్ర అధికారులతో సమీక్షిస్తారు. మార్చి 16, 17, 18లలో వైమానిక ప్రదర్శనలతోపాటు సదస్సులు, చర్చాగోష్ఠులు నిర్వహిస్తారు. చివరి రెండు రోజులు 19, 20లలో పూర్తిస్థాయి ప్రదర్శనలు జరుగుతాయని పౌర విమానయానశాఖ అధికారులు తెలిపారు.