సౌదీ:కంపెనీలు, సంస్థల్లో పని చేసే ఉద్యోగులు, కార్మికుల కుటుంబాలకు కూడా తప్పనిసరిగా బీమా కల్పించాలని సౌదీ ప్రభుత్వం ఆదేశించింది. ఈ మేరకు కౌన్సిల్ ఆఫ్ కోఆపరేటివ్ హెల్త్ ఇన్సూరెన్స్ ఆదేశాలు జారీ చేసింది. ఉద్యోగుల కుటుంబంలో బీమాకు అర్హులైన అందరికీ కంపెనీలు, సంస్థలు ఉచితంగా ఇన్సూరెన్స్ అందించాల్సి ఉంటుంది. ఒక కుటుంబంలో కొందరికీ మాత్రమే బీమాను పరిమితం చేయటం సరికాదని అభిప్రాయపడింది. ఉద్యోగి భార్య, కొడుకులు(25 ఏళ్లలోపు ఉన్నవారికి మాత్రమే), పెళ్లికాని, ఉద్యోగం లేని కూతుళ్లకు తప్పనిసరిగా బీమా సౌకర్యం కల్పించాలని స్పష్టం చేసింది. ఉద్యోగి, కార్మికుడు విధుల్లో చేరిన తొలి రోజు నుంచే అతని కుటుంబానికి బీమా కల్పించాల్సిన బాధ్యత ఆయా కంపెనీలు, సంస్థలదేనని వెల్లడించింది. ఒకవేళ ఉద్యోగి వేరే కంపెనీలో చేరితే కొత్త కంపెనీ యాజమాన్యం బీమా బాధ్యతను తీసుకోవాల్సి ఉంటుంది.