ప్రభుత్వ రంగానికి చెందిన దేశీ అతిపెద్ద ఇన్సూరెన్స్ కంపెనీ లైఫ్ ఇన్సూరెన్స్ కార్పొరేషన్ LIC ఆఫ్ ఇండియా ఎన్నో రకాల పాలసీలు అందిస్తోంది. తక్కువ ప్రీమియంతోనే మంచి రాబడి పొందాలని భావించే వారికి జీవన్ లాభ్ అనే పాలసీ అనువుగా ఉంటుందని చెప్పుకోవచ్చు.

8 ఏళ్ల నుంచి 59 ఏళ్లలోపు వయసు కలిగిన వారు ఈ పాలసీ తీసుకోవచ్చు. పాలసీ టర్మ్ 25 ఏళ్లు, 21 ఏళ్లు, 16 ఏళ్లుగా ఉంది. మీరు 25 ఏళ్ల పాలసీ టర్మ్ ఎంచుకుంటే 16 ఏళ్లు ప్రీమియం కట్టాలి. 21 ఏళ్ల పాలసీ టర్మ్ ఎంచుకుంటే 15 ఏళ్లు ప్రీమియం చెల్లించాలి. 16 ఏళ్ల పాలసీ టర్మ్ అయితే 10 ఏళ్లు ప్రీమియం కట్టాలి.

అంటే మీరు ఎంచుకునే పాలసీ టర్మ్ కన్నా తక్కువ కాలం ప్రీమియం చెల్లిస్తే సరిపోతుంది. పాలసీ తీసుకున్న 3 ఏళ్ల తర్వాత పాలసీపై లోన్ కూడా తీసుకోవచ్చు. కనీసం రూ.2 లక్షల బీమా మొత్తానికి పాలసీ తీసుకోవాలి. గరిష్ట పరిమితి అంటూ ఏమీ లేదు.

ఉదాహరణకు మీకు 25 ఏళ్లు ఉన్నాయి. మీరు 25 ఏళ్ల టర్మ్‌తో పాలసీ తీసుకున్నారు. మీరు రూ.2 లక్షల బీమా మొత్తానికి పాలసీ తీసుకుంటే.. ఇప్పుడు మీకు నెలకు దాదాపు రూ.800 ప్రీమియం పడుతుంది. మీకు మెచ్యూరిటీ సమయంలో రూ.5 లక్షలకు పైగా లభిస్తాయి.