నేరాలు తగ్గుముఖం పట్టడంలో సీసీ కెమెరాలు కీలక పాత్ర పోషిస్తున్నాయని నగర పోలీస్‌ కమిషనర్‌ మహేందర్‌రెడ్డి అన్నారు. వచ్చే ఏడాది కాలంలో హైదరాబాద్‌లో లక్ష కెమెరాలు ఏర్పాటే లక్ష్యంగా నిర్దేశించుకున్నట్లు తెలిపారు. ఇందుకు ప్రజల సహకారం కూడా ఎంతో అవసరమన్నారు. ఇప్పటికే నగరంలో 15వేల సీసీ కెమెరాల ఏర్పాటు పూర్తయినట్లు చెప్పారు.గత సంవత్సరం జనవరి, ఫిబ్రవరిలతో పోల్చితే ఈ ఏడాది రెండు నెలల్లో 30 శాతం మేర నేరాలు తగ్గాయన్న ఆయన సీసీ కెమెరాలు విస్తృతంగా ఏర్పాటుచేయడమే దానికి ప్రధాన కారణమని అభిప్రాయపడ్డారు. మెహిదీపట్నం నుంచి మల్లేపల్లి కూడలి వరకు ఏర్పాటుచేసిన 38 సీసీ కెమెరాలను, కమాండ్‌ కంట్రోల్‌ను ఆయన ప్రారంభించారు. ఈ కార్యక్రమంలో అదనపు కమిషనర్‌ అంజనీకుమార్‌, డీసీపీ వెంకటేశ్వరరావు తదితరులు పాల్గొన్నారు.