కువైట్: పోయి పోయి పోలీసులతోనే పెట్టుకొని జైలు పాలయ్యారు నలుగురు సోదరులు. కువైట్లోని అబ్దుల్లా ముబారక్ ప్రాంతంలో ఈ ఘటన చోటు చేసుకుంది. బంధువుల మధ్య మొదలైన చిన్న గొడవ చిలికి చిలికి పెద్ద దుమారం రేపింది. మాట మాట పెరిగి గొడవ పెద్దదవటంతో బంధువుల్లో కొందరు పోలీస్ కంట్రోల్ రూం ఫోన్ చేసి అత్యవసరంగా రావాల్సిందిగా కోరారు. దీంతో పోలీసులు హుటాహుటిన అక్కడికి చేరుకున్నారు. అయితే..పోలీసులు వచ్చిన తర్వాత కూడా గొడవ సద్దుమణగలేదు. పైగా పోలీసులపైనే దాడికి తెగబడ్డారు నలుగురు అన్నదమ్ములు. దీంతో వారిని నియంత్రించేందుకు పోలీసులు గాల్లోకి కాల్పులు జరపాల్సిన పరిస్థితి ఏర్పడింది. కాల్పుల అనంతరం తమపై దాడికి పాల్పడిన ఆ నలుగురు సోదరులను పోలీసులు అరెస్ట్ చేశారు.