ఎప్పటికప్పుడు వినూత్నమైన ఫీచర్లతో యూజర్లను ఆకట్టుకోవడంలో వాట్సాప్​ముందుంటుంది. అందుకే ఇన్​స్టంట్ మెసేజింగ్​ యాప్స్​లో వాట్సాప్​ ఇప్పటికీ టాప్​ ప్లేస్​లో రాణిస్తోంది. ఈ యూజర్ ఫ్రెండ్లీ యాప్​ తాజాగా మరో కొత్త ఫీచర్లపై పనిచేస్తుంది. సరికొత్త వాయిస్​ కాల్​ ఇంటర్​ఫేజ్​, ఎమోజీల కోసం షార్ట్​కట్​, అప్​డేటెడ్​ వాయిస్​ నోట్​ ఫార్వర్డ్ వంటి కొత్త ఫీచర్లను తీసుకురానుంది. వాట్సాప్​ బీటా ఇన్ఫో ప్రకారం, ఇప్పటికే టెస్టింగ్ కోసం కొంతమంది వాట్సాప్ బీటా యూజర్లకు ఈ కొత్త ఫీచర్లను అందుబాటులో తెచ్చింది. త్వరలోనే ఆండ్రాయిడ్, ఐఓఎస్​ యూజర్లకు అందుబాటులోకి రానున్నాయి. ప్రత్యేకంగా గ్రూప్​ వాయిస్​ కాల్స్​ కోసం ఈ ఫీచర్​ను తీర్చిదిద్దినట్లు తెలుస్తోంది.

ఈ ఫీచర్​ అందుబాటులోకి వస్తే.. వాయిస్​ కాల్​ సమయంలో​ గ్రూప్​లోని ప్రతి ఒక్కరికి రియల్ టైమ్​ వేర్​ఫారమ్​ను చూపిస్తుంది. తద్వారా వాయిస్​ కాల్​లో ఎవరు మాట్లాడుతున్నారో, ఎవరు మ్యూట్​లో ఉన్నారో సులభంగా తెలుసుకునే వీలుంటుంది. అలాగే, ఈ కొత్త ఇంటర్​ఫేజ్​లో వాల్​పేపర్​లను కూడా విడుదల చేయాలని వాట్సాప్​ యోచిస్తున్నట్లు సమాచారం. ఈ కొత్త వాట్సాప్ వాయిస్ కాల్ ఇంటర్‌ఫేస్ ముందు, మధ్యలో రౌండ్ గ్రే స్క్వేర్‌తో రానుంది. దీనిలో కాంటాక్ట్ పేరు, నంబర్, ప్రొఫైల్ చిత్రం వంటివి కనిపిస్తాయి.

టెస్టింగ్​ కోసం బీటా యూజర్లకు అందుబాటులోకి..
కాగా, ఫార్వర్డ్ నోట్స్, ఆడియో ఫైల్స్​ మధ్య తేడాలను గుర్తించడానికి వాట్సాప్​ త్వరలోనే మరో కొత్త ఫీచర్‌ను తీసుకురానుంది. ఈ కొత్త ఫీచర్​ ద్వారా ఫార్వర్డ్ చేసిన వాయిస్​ నోట్స్​ ఇకపై నారింజ రంగులో కనిపించనున్నాయి. అలాగే, ఇతరులతో చాటింగ్​ చేస్తున్న సమయంలో ఎమోజీని త్వరగా ఎంచుకోవడానికి వాట్సాప్​ షార్ట్​కట్​లను అందుబాటులోకి తేనుంది. దీనికి గాను యూజర్లు ఇష్టపడే ఎమోజీకి సంబంధించిన కీవర్డ్ ఎంటర్​ చేయాల్సి ఉంటుంది. ఈ ఫీచర్లు ప్రస్తుతానికి బీటా యూజర్లకు మాత్రమే పరిచయం చేసినప్పటికీ.. త్వరలోనే ఐఓఎస్​, ఆండ్రాయిడ్​ యూజర్లకు అందుబాటులోకి వస్తాయని టెక్​ నిపుణులు చెబుతున్నారు.

మరోవైపు, వాట్సాప్​ ఇటీవల తమ నిబంధనలను ఉల్లంఘించిన వారి అకౌంట్స్‌ను బ్లాక్​ చేసిన విషయం తెలిసిందే. అకౌంట్ బ్లాకింగ్ గురించి యూజర్లు రియాక్ట్ అవ్వడానికి వాట్సాప్​ కొత్త స్క్రీన్‌ తీసుకొచ్చే యోచనలో ఉంది. వాట్సాప్ అతి త్వరలోనే 'కమ్యూనిటీ' ఫీచర్‌ను విడుదల చేయడానికి కూడా కృషి చేస్తోంది. కమ్యూనిటీ అనేది వాట్సాప్‌లో గ్రూప్​ అడ్మిన్లకు మరింత నియంత్రణ ఇచ్చే ఫీచర్​. ఇది గ్రూప్ చాట్ మాదిరిగానే పనిచేస్తుంది.