మక్కా: 2022 హజ్ సమయంలో విదేశీ యాత్రికుల కోసం సమగ్ర బీమా కార్యక్రమాన్ని హజ్, ఉమ్రా మంత్రిత్వ శాఖ అమలు చేస్తోంది. ఇది వ్యక్తిగత ప్రమాదాలను కవర్ చేస్తుంది. ఈ కార్యక్రమం కింద  ఏదైనా ప్రమాదం కారణంగా మరణం లేదా శాశ్వత మొత్తం వైకల్యం, మరణించిన యాత్రికుల మృతదేహాలను వారి బంధువులు కోరుకుంటే వారి స్వదేశానికి పంపిస్తారు. ఈ కార్యక్రమం సంస్థాగత నిర్బంధం, చికిత్స ఖర్చుల పరంగా COVID-19 ఇన్‌ఫెక్షన్ కేసులను కవర్ చేయడంతో పాటు, రాజ్యం నుండి బయలుదేరే విమానాల రద్దు లేదా ఆలస్యం కేసులకు పరిహారం కూడా వర్తిస్తుంది. హజ్, ఉమ్రా యాత్రికుల అనుభవాన్ని మెరుగుపరచడం కోసం సౌదీ విజన్ 2030 లక్ష్యాలకు అనుగుణంగా యాత్రికులు తమ ఆచారాలను సులభంగా, సౌకర్యంగా నిర్వహించేలా చేయడం ఈ కార్యక్రమ ప్రధాన లక్ష్యమని మంత్రిత్వ శాఖ పేర్కొంది. హజ్, ఉమ్రా మంత్రిత్వ శాఖ మరియు సౌదీ సెంట్రల్ బ్యాంక్ (SAMA) పర్యవేక్షణలో ఈ పథకం అమలవుతోంది.  తవునియా ఇన్సూరెన్స్ కంపెనీ నేతృత్వంలోని అన్ని స్థానిక బీమా కంపెనీల ద్వారా బీమా కార్యక్రమం అందించబడుతోంది. యాత్రికులు కోవిడ్-19 సోకిన సందర్భంలో వారికి ఏదైనా చికిత్స అవసరమైతే సమీపంలోని ఆసుపత్రి లేదా ఆరోగ్య కేంద్రంలో క్వారంటైన్ సౌకర్యం లేదా చికిత్స పొందడం ద్వారా ప్రోగ్రామ్ సేవల నుండి ప్రయోజనం పొందవచ్చు. ఈ స్కీం లాభాన్ని పొందేందుకు యాత్రికులు తమ పాస్‌పోర్ట్ నంబర్‌ను తప్పనిసరిగా అందించాల్సి ఉంటుంది.  800440008 నంబర్‌కు కాల్ చేయడం ద్వారా లేదా వెబ్‌సైట్: www.enaya-ksa.com  ద్వారా దరఖాస్తును సమర్పించవచ్చని హజ్, ఉమ్రా మంత్రిత్వ శాఖ తెలిపింది.