75 ఏళ్ల స్వాతంత్ర్యం సందర్భంగా స్వాతంత్ర్య దినోత్సవ వారోత్సవాలు దేశం మొత్తం ఘనంగా జరుగుతున్న సంగతి తెలిసిందే. ‘హర్ ఘర్ తిరంగా’ పేరుతో ప్రతీ ఇంటిపైనా జాతీయ జెండా రెపరెపలాడుతూ ప్రతి ఒక్కరిలోనూ దేశభక్తిని చాటి చెబుతోంది.ఈ సందర్భంగా ఓ దేశ భక్తి చిత్రం చర్చకు వచ్చింది.
‘1770’ అనే టైటిల్‌తో రూపొందుతోన్న చిత్రమిది. ప్రముఖ బెంగాలీ రచయిత బంకించంద్ర ఛటర్జీ రచించిన ‘ఆనంద్‌మఠ్’ నవల ఆధారంగా ఈ సినిమా రూపొందిస్తున్నారు. తెలుగుతో సహా పలు భాషలలో ఈ సినిమాని తెరకెక్కిస్తున్నారట. తాజా పరిస్థితుల నేపథ్యంలో ఈ సినిమా మోషన్ పోస్టర్‌ని ఘనంగా రిలీజ్ చేశారు. 
రాజమౌళి శిష్యుడు అశ్విన్ గంగరాజు ఈ సినిమాకి దర్శకత్వం వహిస్తున్నాడు. గతంలో ‘ఆకాశ వాణి’ అనే సినిమాతో దర్శకుడిగా పరిచయమయ్యాడు అశ్విన్ గంగరాజు. ఈ సినిమాకి రాజమౌళి నుంచి బాగా సపోర్ట్ లభించిందట. ఆయన తండ్రి విజయేంద్ర ప్రసాద్ ఈ సినిమాకి కథ, స్ర్కీన్‌ప్లే అందిస్తున్నారు. 
దేశ భక్తి కథాంశం కావడంతో, ఈ సినిమాకి సంబంధించి పీరియాడిక్ సెట్స్, పీరియాడిక్ ఎమోషన్స్‌పై ఎక్కువ ఫోకస్ పెట్టబోతున్నారట. స్వాతంత్ర్య సమరానికి స్పూర్తి నింపిన యోధులెందరో ఈ సినిమాలో ప్రస్థావనకొస్తారట. నటీనటులు, మిగిలిన టెక్నీషియన్స్ వివరాలు దీపావళికి వెల్లడి చేయనున్నారట.