రియాద్: చెల్లుబాటు అయ్యే పాస్‌పోర్ట్‌లను కలిగి ఉన్న సౌదీ పౌరులు జూన్ 1, 2023 నుండి సింగపూర్‌లోకి ప్రవేశించడానికి వీసా కోసం దరఖాస్తు చేయాల్సిన అవసరం లేదని రియాద్‌లోని సింగపూర్ ఎంబసీ ప్రకటించింది. సింగపూర్ ఇమ్మిగ్రేషన్ అండ్ చెక్‌పాయింట్స్ అథారిటీ (ఐసిఎ) ఈ మేరకు తన నిర్ణయాన్ని వెలువరించినట్లు రాయబార కార్యాలయం తన ట్విట్టర్ ఖాతాలో తెలిపింది. సౌదీ దౌత్య పాస్‌పోర్ట్‌లను కలిగి ఉన్నవారికి సింగపూర్ వీసా అవసరాల నుండి ఇప్పటికే మినహాయింపు ఉందని రాయబార కార్యాలయం ట్వీట్ చేసింది. ఇతర సౌదీ జాతీయులందరూ జూన్ 1లోపు సింగపూర్‌లోకి ప్రవేశించాలనుకుంటే వారు ఎంట్రీ వీసా కోసం దరఖాస్తు చేసుకోవాలని, జూన్ ప్రారంభం నుండి ఎంట్రీ వీసా అవసరానికి మినహాయింపు ఉంటుందని పేర్కొంది. ఇప్పటికే ఎంట్రీ వీసా కోసం దరఖాస్తును సమర్పించిన లేదా వారి ఎంట్రీ వీసా దరఖాస్తుల ఫలితాన్ని పొందిన వారికి వీసా ప్రాసెసింగ్ ఫీజు రీఫండ్ ఉండదని రాయబార కార్యాలయం  చెప్పింది.