కువైట్: ప్రవాసులకు డ్రైవింగ్ లైసెన్సుల జారీని 3 సంవత్సరాల బదులుగా.. ఒక సంవత్సరం మాత్రమే చెల్లుబాటుతో ఆన్‌లైన్‌లో పునరుద్ధరించనున్నట్లు కువైట్ ట్రాఫిక్ డిపార్టుమెంట్ వెల్లడించింది. కొంతమంది ప్రవాసులు లైసెన్స్‌ను 3 సంవత్సరాల పాటు పునరుద్ధరించుకొని ఆపై వృత్తిని మార్చుకుంటున్నట్లు గుర్తించారు. దీంతో మూడు సంవత్సరాల కాలానికి లైసెన్స్‌ల పునరుద్ధరణను నిలిపివేయాలని ప్రభుత్వం నిర్ణయించింది. ప్రవాసులు డ్రైవింగ్ వృత్తిలో కొనసాగిన పక్షంలో ఎలాంటి ఆటంకాలు లేకుండా ఏటా లైసెన్స్ రెన్యూవల్ చేసుకుంటూనే వృత్తిలో మార్పు వచ్చినా అందుకు సంబంధించిన విధివిధానాలను అనుసరించాల్సి ఉంటారని ట్రాఫిక్ విభాగం తన ప్రకటనలో తెలిపింది.