దుబాయ్: షేక్ మొహమ్మద్ బిన్ జాయెద్ రోడ్డులో ట్రక్కును ఢీకొట్టి మంటలు చెలరేగడంతో అందులో చిక్కుకొని కారు డ్రైవర్ మృతి చెందాడు. ట్రాఫిక్ రిజిస్ట్రేషన్ హెడ్, బర్ దుబాయ్ పోలీస్ స్టేషన్ కెప్టెన్ అహ్మద్ ఖల్ఫాన్ బిన్ లాహెజ్ మాట్లాడుతూ.. వాహనదారుడు షేక్ మొహమ్మద్ బిన్ జాయెద్ రోడ్డులో అక్రమంగా నిష్క్రమించడానికి ప్రయత్నించాడని తెలిపారు. అతని వాహనం అదుపుతప్పి ట్రక్కును ఢీకొట్టింది. దాంతో కారులో మంటలు చెలరేగాయని, అందులో చిక్కుకొని డ్రైవర్ మరణించాడని పేర్కొన్నారు.  డ్రైవర్ వెంటనే మృతి చెందగా, కారు పూర్తిగా ధ్వంసమైంది. కాలిపోయిన వాహనం నంబర్ ప్లేట్ నుండి పోలీసులకు కేవలం రెండు అంకెలు మాత్రమే లభించాయి.దీంతో మృతుడి గుర్తింపును నిర్ధారించడం కష్టంగా మారింది. ఘటన జరిగిన ప్రాంతంలో లభించిన చిన్న కాగితం ముక్క ఆధారంగా వాహనం యజమానిని ట్రేస్ చేసి సంప్రదించగా, అతను తన కారును స్నేహితుడికి ఇచ్చినట్టుగా చెప్పాడు. ఈ సమాచారం ఆధారంగా మృతుడిని గుర్తించినట్లు బిన్ లాహెజ్ తెలిపారు.