బహ్రెయిన్: రిఫా సెంట్రల్ మార్కెట్‌లో అభివృద్ధి పనులు 60% పూర్తయ్యాయని, ఈ ఏడాది చివరికల్లా ప్రారంభించేందుకు సన్నాహాలు చేస్తున్నట్లు మంత్రిత్వ శాఖలోని మునిసిపల్ వ్యవహారాల అండర్ సెక్రటరీ షేక్ మొహమ్మద్ బిన్ అహ్మద్ అల్ ఖలీఫా తెలిపారు. సదరన్ రీజియన్ మున్సిపల్ కౌన్సిల్ చైర్మన్ అబ్దుల్లా అబ్దుల్ లతీఫ్‌తో కలిసి అభివృద్ధి పనులను పరిశీలించారు. జాయింట్ మున్సిపల్ సర్వీసెస్ కోసం అసిస్టెంట్ అండర్ సెక్రటరీ రావియా అల్-మన్నై,  సదరన్ రీజియన్ మునిసిపాలిటీ డైరెక్టర్ జనరల్ ఇస్సా అల్-బుయినైన్, ఇతర మంత్రిత్వ శాఖ అధికారులు ఈ కార్యక్రమంలో పాల్గొన్నారు.

పౌరుల పెరుగుతున్న అవసరాలకు అనుగుణంగా తాజా భద్రత, సాంకేతిక ప్రమాణాలకు అనుగుణంగా సెంట్రల్ మార్కెట్లను అభివృద్ధి చేయడానికి మంత్రిత్వ శాఖ కట్టుబడి ఉందని ఆయన వివరించారు. రిఫ్ఫా సెంట్రల్ మార్కెట్ చేపలు, మాంసం, కూరగాయల కోసం రోజువారీ మార్కెట్‌కు ప్రసిద్ధి చెందిందని, పనుల కారణంగా ప్రజలు ప్రభావితం అవుతున్నారని మంత్రిత్వ శాఖ తెలిపింది. సదరన్ గవర్నరేట్ నివాసితులకు ఆహార భద్రత కల్పించడంలో సెంట్రల్ మార్కెట్ కీలక పాత్ర పోషిస్తుందన్నారు.

సదరన్ రీజియన్ మునిసిపాలిటీ డైరెక్టర్ జనరల్ ఇస్సా అల్-బుయినైన్ మాట్లాడుతూ.. మార్కెట్ ప్రస్తుత భవనాన్ని 2,323 చదరపు మీటర్ల విస్తీర్ణంలో విస్తరిస్తున్నట్లు చెప్పారు. ఈ విస్తరణలో 40 కూరగాయల స్టాళ్లు, 13 చేపల స్టాళ్లు, 7 మాంసం స్టాళ్లు, చికెన్ కోసం రెండు స్టాళ్లు ఉంటాయన్నారు. మినా అల్-జాద్ మార్కెట్స్ ప్రధాన ముఖభాగాన్ని మెరుగుపరచడం, సందర్శకులు - అమ్మకందారుల కోసం పారిశుద్ధ్య సౌకర్యాలను అందించడం,  100-చదరపు-మీటర్ల ఫలహారశాలను ఏర్పాటు చేయడం వంటి పనులు కొనసాగుతున్నాయని తెలిపారు. అభివృద్ధి పనులు పూర్తయ్యే వరకు అమ్మకందారులకు సేవలందించేందుకు తాత్కాలిక మార్కెట్‌ను ఏర్పాటు చేశామని అల్-బుయినైన్ చెప్పారు. ప్రత్యామ్నాయ సైట్‌లో కూరగాయలు, పండ్లు, చేపలు, మాంసం విక్రయదారుల కోసం అదే సంఖ్యలో స్టాల్స్‌ను అందిస్తున్నట్లు పేర్కొన్నారు.