కువైట్: ఈద్ అల్-అదా సెలవులు, వేసవి సెలవుల సీజన్ ప్రారంభం కావడంతో కువైట్ అంతర్జాతీయ విమానాశ్రయం నుండి వేలాది మంది ప్రయాణీకులు ట్రావెల్ చేస్తున్నారు. విమానాశ్రయం ఆపరేటింగ్ అధికారుల సహకారంతో వందలాది విమానాలు, వేలాది మంది ప్రయాణికులకు వసతి కల్పించడానికి పూర్తి సామర్థ్యంతో పని చేస్తున్నట్లు డైరెక్టరేట్-జనరల్ ఆఫ్ సివిల్ ఏవియేషన్ తెలిపింది. లాంజ్‌లలో రద్దీని నివారించడానికి ప్రయాణికుల రాకపోకలను వీలైనంత వేగంగా పూర్తిచేయడానికి ప్రయత్నిస్తున్నట్లు పేర్కొంది. విమానశ్రయంలో పాస్‌పోర్ట్ కౌంటర్ల సంఖ్యను పెంచడం, కౌంటర్‌లలో సిబ్బంది స్థాయిలను పెంచడం, ప్రయాణికుల సామాను రవాణా చేయడానికి తగిన గ్రౌండ్ సర్వీస్ కంపెనీ లేబర్ ఉండేలా చూసుకోవడం లాంటి చర్యలు తీసుకుంటున్నట్లు DGCA తన ప్రకటనలో తెలిపింది.