Devi Navratri vrat 2023 : దుర్గా మాతను ప్రసన్నం చేసుకోవడానికి చాలా మంది నవరాత్రులలో ఉపవాసం ఉంటారు. కొంతమంది మొత్తం తొమ్మిది రోజులు ఉపవాసం ఉంటారు. మరికొందరు మొదటి మరియు చివరి రోజులలో ఉపవాసం ఉంటారు. అయితే ఉపవాస సమయంలో కొన్ని జాగ్రత్తలు తీసుకోవడం తప్పనిసరి. ఈ ఏడాది అక్టోబర్ 15 నుంచి ఈ పండుగ ప్రారంభం కానుంది. నవరాత్రులలో, అమ్మవారిని 9 రోజులు ప్రతిష్టించి పూజిస్తారు.   

నవరాత్రులలో మొదటి రోజున ఘట స్థాపన నిర్వహిస్తారు. ఇది నవరాత్రులలో ముఖ్యమైన ఘట్టాలలో ఒకటి. నవరాత్రి వ్రతం పాటించేవారు ప్రతిపద తిథి నుండి దశమి వరకు నిరంతరం దీపం వెలిగించాలి.  నవరాత్రులలో ప్రతిరోజూ అమ్మవారి వివిధ అవతారాలను పూజిస్తారు. పూజ సమయంలో ఎర్రని వస్త్రాలు ధరించి, వివిధ రూపాల్లో అమ్మవారికి ఎర్రని పుష్పాలను సమర్పించాలి.    

దుర్గాదేవిని ప్రసన్నం చేసుకోవాలంటే నవరాత్రులలో ఎవరిపైనా కోపం, పగ పెంచుకోకూడదు. ఉపవాసం ఉండే భక్తులు ఇతరులను విమర్శించడం లేదా దూషించడం మానుకోవాలి. అమ్మవారి సేవలోనే ఉండాలి. ఈ సమయంలో పేదలకు సహాయం చేయండి. తద్వారా ఇంట్లో ఐశ్వర్యం, ఆనందం వెల్లివిరుస్తాయి. నవరాత్రులలో ఉపవాసం ఉండే భక్తులు ఈ కాలంలో షేవింగ్ లేదా జుట్టు కత్తిరించుకోవడం మానుకోవాలి. ఇలా చేస్తే దుర్గాదేవికి కోపం వస్తుందని నమ్మకం.