మస్కట్: మస్కట్‌లో బుధవారం జరిగిన జిసిసి అంతర్గత వ్యవహారాల మంత్రుల 40వ సమావేశానికి ఒమన్ సుల్తానేట్ అధ్యక్షత వహించింది. అంతర్గత వ్యవహారాల మంత్రి సయ్యద్ హమూద్ ఫైసల్ అల్ బుసాయిదీ సమావేశానికి అధ్యక్షత వహించారు. ఈ సంధర్భంగా మాట్లాడుతూ.. భద్రతా సవాళ్లు, నేరాలు చేయడం, సాంకేతిక పురోగతిని ఉపయోగించుకోవడం వంటి రూపాల్లో వేగవంతమైన మార్పులను ఎదుర్కోవడానికి సమన్వయం, సంప్రదింపులను బలోపేతం చేయడం కొనసాగించాల్సిన అవసరం ఉందని చెప్పారు. ఆరు జిసిసి దేశాల మధ్య నివాసితులు, పర్యాటకుల రాకపోకలను సులభతరం చేయడానికి ఏకీకృత గల్ఫ్ టూరిస్ట్ వీసా ప్రాజెక్టుకు మంత్రులు ఆమోదం తెలిపారు. అలాగే జీసీసీ దేశాల్లో ట్రాఫిక్ ఉల్లంఘనలను ఎలక్ట్రానిక్ పద్ధతిలో అనుసంధానం చేసేందుకు మొదటి దశ ప్రాజెక్టును ప్రారంభించేందుకు మంత్రులు ఆమోదం తెలిపారు. మాదకద్రవ్యాలను ఎదుర్కోవడానికి రూపొందించబడిన సమగ్ర గల్ఫ్ వ్యూహాన్ని అభివృద్ధి చేయడానికి ఆమోదం తెలిపారు.