యూఏఈ: గూగుల్ తన కొత్త ఇన్‌యాక్టివిటీ పాలసీని ఆగస్ట్ 4న విడుదల చేసింది. ఇందులో భాగంగా డిసెంబర్ 1 తర్వాత యాక్టివ్‌గా లేని జీమెయిల్ ఖాతాలను తొలగించడం ప్రారంభించనున్నట్లు వినియోగదారులకు అలెర్ట్ జారీ చేసింది. గూగుల్ ఖాతాల కోసం ఇనాక్టివిటీ వ్యవధిని రెండేళ్లకు అప్‌డేట్ చేసినట్లు వెల్లడించారు. వినియోగదారు రెండేళ్లలోపు లాగిన్ చేయకపోతే ఆ ఖాతాలను డియాక్టివ్ గా పరిగణిస్తారు.  ఒకసారి తొలగించిన తర్వాత కొత్త ఖాతా కోసం Gmail చిరునామాను మళ్లీ ఉపయోగించలేరని పేర్కొంది. అయితే ప్లాట్‌ఫారమ్, ఇ-మెయిల్‌ను తుడిచిపెట్టే ముందు వినియోగదారులకు అనేకసార్లు తెలియజేయబడుతుందని స్పష్టం చేసింది. ఖాతాలపై ఏదైనా చర్య తీసుకోవడానికి కనీసం 8 నెలల ముందు ఈ రిమైండర్ ఇ-మెయిల్‌లు పంపబడతాయన్నారు.  ఇందులో భాగంగా గూగుల్ యాజమాన్యంలో ఉన్నందున యూట్యూబ్ అకౌంట్లను కూడా తొలగించనున్నారు. అయితే యూట్యూబ్ ఛానెల్‌లు, వీడియోలు లేదా వ్యాఖ్యలతో ఖాతాలకు పాలసీ నుండి మినహాయింపు ఉందని గూగుల్ తెలిపింది.  

మీ ఖాతాను యాక్టివ్‌గా ఉంచుకోవడం ఎలా

వినియోగదారులు తమ ఖాతాలను యాక్టివేట్ గా ఉంచడంలో సహాయపడే కొన్ని సులభమైన మార్గాలను గూగుల్ సూచించింది. అవి, ఇ-మెయిల్ చదవడం లేదా పంపడం, గూగుల్ డిస్క్‌ని ఉపయోగించడం, యూట్యూబ్ వీడియో చూడటం, ఫోటోను షేర్ చేయడం, యాప్‌ను డౌన్‌లోడ్ చేసుకోవడం, గూగుల్ సెర్చ్ ను ఉపయోగించడం, థార్డ్ పార్టీ అప్లికేషన్ల సేవకు గూగుల్ తో సైన్ ఇన్ చేయడం ద్వారా అకౌంట్లను యాక్టివేట్ గా పెట్టుకోవచ్చని తెలిపింది.